دیدار: هەودان سەعید
رۆمانا (ئوكتوبەرەك ژ مژێ) رۆمانا دوویێ یا نڤێسەرا خامەژیر و وێرەك و ئازاد (كەوسەر شەوكەت)ێ یە، پشتی رۆمانا (مرن د زەنگا 12 دا)، رۆمانا وێ یا نوی، ژ وان رۆمانایە كو بەری دەمەكێ كێم هاتیە بەلاڤكرن. دیرۆكا كوردان دیرۆكەكا كویر و دیر و دوبارەكریە ب هەمان شاشی، لەوما نڤێسەرێ ب رەنگەكێ جوان قارەمانێن رۆمانێ كرینە د خزمەتا وەلاتیدا ل دەما ب خەم خورێن وەلاتی و لێگەرێن فاكتەرێن شكەستنا بزاڤێن ئازادیخواز و نەتەوەیێن كوردی داناین. ل هەمبەر گۆتنێن ماكیاڤێللی ژبۆ ئێگرتنا ئیتالیا، پێكولێن خانی كرین ژبۆ ئێكگرتنا میرێن كورد كرینە میناك، دیسان بزاڤێن میر بەدرخان پاشای و پەیمانا )قولپا( پیرۆز ژبۆ پراكتیزەكرنا گۆتنێن خانی ژ بو ئێكگرتنا میرێن كورد ل بیر ئیناینە و خواندەڤان دكاریت تێبگەهیت، كو ئەگەر كار ل سەر گۆتنێن خانی و دانایی و مفا ژ دیرۆكا مە یا دوبارەكری هاتبا وەرگرتن، دویر نەبوو ئەم كورد نها د قوناغەكا باشتر داباین. هەر دیسان نڤێسەرێ د هندری پاراگرافێن رۆمانێدا تیشك هاڤێتینە سەر ئازارێن كچ و ژنان د جڤاكێ كوردیدا، زێدەباری بابەتێ سەرەكی كو عەشق و ڤیانا وەلاتیە و بۆ پتر زانیاریان دەربارەی رۆمانێ ژبۆ خاندەڤانێن رۆژناما مە (كەڤروكا) مە ئەڤ دیدارە دگەل نڤێسەرا رۆمانێ كەوسەر شەوكەتسازكر و چەند پرسەك ئاراستە كرن وێ ژی ب دلەكێ بەرفرهـ بەرسڤا مەدا.
دێ ئێكەم پرس ژ ناڤێ رۆمانێ دەستپێكەین، بوچی ناڤێ رۆمانێ (ئوكتوبەرەك ژ مژێ) یە مەرەما تە پێ چبو ئەرێ پەیوەندی ب 16ی ئوكتوبەرا سالا 2017 ڤە هەیە؟
كەوسەر شەوكەتێ د بەرسڤێدا گۆت: نەخێر ناڤێ وێ چ پەیوەندی ب 16ئوكتوبەرا 2017 ڤە نینە، بەلكی ئەو ناڤ ژ كومەكا ناڤێن دی یێن دەست نیشانكری هاتیە هەلبژارتن، ئەڤە گرێدای ناڤەروكا رۆمانێ بویە، پتریا رویدانێن وێ ل مەها ئوكتوبەرێ بوینە، ژ ئالیەكێ دی ڤە ئەو ناڤ یێ سەرنج راكێش بویە، دشیان دانە خاندەڤانی ب راوستینیت و هزربكەت كانێ ساخلەتێن ئوكتوبەرێ چنە، كیش مەهە، سەقایێ وێ چەوایە! ئایا ئوكتوبەرێ و مژێ چ پەیوەندی دگەلك دا هەیە؟!
ل دور پرسەكا مە ئەرێ بوچی تە عەشق و ڤیانا وەلاتی كرینە بابەتێ سەرەكیێ رۆمانێ؟
كەوسەرێ دیاركر كو بێ عەشق مرۆڤ یێ بەرزەیە، بێ وەلات مرۆڤ یێ ئێتیمە. سەرەرای وێ یەكێ كو عەشق و وەلات دوو بابەتێن مە هێش بدروستی بهایێ وان نەزانیە بەلكی ئەم گەلەك تێدا د هەژارین، مە عەشق ب شەرم یا ل قەلەم دای، دیسا ڤیانا وەلاتی گەلەكا ژ پەروەردەكرنا مە یا كیڤی یە، وەكی یا دیار كاودانێن نها یێن تژینە ژ كوشتن و تالانكرن و وێرانكرنێ ، لەورا ژ هەر تشتی پتر مە پێویستی ب عەشقا مرۆڤا و ڤیانا وەلاتی هەیە، دا مرۆڤاتی و ئاشتیێ بەلاڤ بكەین.
ل دەما مە ژ كەوسەرێ پرسی كو دكارین سەربورێن كەسایەتی و رویدانێن ژیانا تایبەتیا وێ دناڤا پاراگرافێن رۆمانێدا ببینین؟
كەوسەرێ د بەرسڤێدا گۆت: نەخێر چ سەربور و رویدانێن ژیانا من یا تایبەت و كەساتیا من دناڤ دانین، بەلكی سەرهاتیا رۆمانێ هەر تاكەك دشێت خۆ تێدابینت.
مە پرسەكا دی ئاراستەی كەوسەرێ كر ل دوور قارەمانێن رۆمانا (ئوكتوبەرەك ژ مژێ) نیدەم كو كچەكا خوێندكارا كولیژێ پشكا دیرۆكێیە حەز ژ ماموستایێ خو یێ زانكویێ ئارژانی دكەت، ئەرێ تو ب رەوا دبینی پەیوەندیا خوێندكار و ماموستای بچیتە د قالبێ عەشقێدا، بوچی؟
بەرسڤا كەوسەرێ ئەڤە بوو: جارێ هەكە ئەز بێژم، خوێندكار و ماموستا! ئەم بچاڤێن دوو تاكێن سادە وەكی هەمیان بەرێخودەینێ، لێ یا راستی ئەڤە دوو شەنگستێن سەرەكینە دئاڤاكرنا كومەلگەهادا، هەر دەما مە خواست بەرەڤ پێشڤە بچین دڤیا پێنگاڤا ئێكێ ژ ڤان دوو شەنگستا دەست پێبكەین، لێ هەلبەت ماموستا ژی خودان هەستە، تاكە تشتێ بێ دەستویری دهێت،ئەوا چ سنورو بەر بەربەستا نەنیاسیت مانە بتنێ عەشقە؟ دەربارەی پەیوەندیا عەشقێ دناڤبەرا ماموستا و خوێندكارا وی! جارێ عەشق بخۆ پیرۆزیە! ئەو پەیوەندی دناڤبەرا كێ دابیت دبینم پیرۆزی، هەلبەت یا ماموستا و خوێندكارێ پەیوەندیەكا دی یترە كو گرنگە رێز لێ بهێت گرتن، هندی د چارچوڤێ خوێندكار و ماموستای دابیت، دناڤا رۆمانێ بخو ژی دا ئەڤ چەندە باش یا روهن بوو، ئارژان وەك ماموستا ل ناڤا حەرەمێ زانكویێ دا گەلەك ب پیرۆزی برولێ خۆ یێ ماموستایێ رادبوو، هەر ئەو پەیوەندی بوویە ئەو نەچار دكری حەزكرنا خۆ بڤەشێریت.
دیسان مە ژ كەوسەرێ پرسی بوچی دناڤا رۆمانێدا گەلەك رەخنە هاتینە كرن بێ دیاركرنا رێكە چارەیان؟
كەوسەرێ بڤی ئاوای بەرسڤا مە دا: ئوكتوبەرەك ژ مژێ، رۆمانەكە بابەتەكێ زورێ گرنگ ئازراندییە، ئەو ژی سەرنەكەفتنا بزاڤێن دیرۆكا كوردی ژ بۆ ئێكگرتن و دەولەتبوونێ! ئەڤ پرسێن هەنێ یێن كو بووینە رەخنە، ب نێرین و دویڤچوون و خاندنا خوێندكارەكێنە، ئەڤە بخۆ ژی بابەتەكێ گرنگكترە، ژبەركو هەكە تو بكویرێ هزرتێدا بكەی یابەرعاقل نینە، ل سەر زارێ یان ژی ل پشت ڤەگێرانا سەربورا خوێندكارەكا زانكویێ چارەسەریێ بۆ كێش و پرسگرێكن دیرۆكا وەلاتەكی بدارێژی و تو یا باس ل خوێندكارەكێ دكەی سەربورا وێ هێش ل قوناغا زانكویێ دابیت، ئانكو یا من دڤێت بێژم ب مەرەم رەخنە كا بێ چارەسەری هاتیە دارشتن.
لدور نامه و پەیاما كو كەوسەرێ ڤیای بگەهینیت د رۆمانێ دا چ بوو؟
كەوسەرێ گۆت: پەیاما سەرەكی یا من دڤیا بگەهینم ئەو ناڤ و بزاڤ و خەباتا دسەرێ مەدا هاتیە چاندن كو پیرۆزینە، ئەو پیرۆزی قابلی رەخنێنە، ئەگەر نە، بوچی وان پیرۆزیا ئەنجام نەبوون؟ گرنگە راستیا وان بهێت خویاكرن، دیسان ئەركێ زانكویێ ئاڤاكرن و بەرهەم ئینانا تاكەكێ پێگەهشتییە نەك دەرچویەكێ بێكار، ل داویێ ژی وەلات ل سەردەستێ خوێندكار و ماموستایا دهێت ئاڤاكرن.
سەبارەت پرسەكا دی ل دور رۆمانا ئێكێ یا كەوسەرێ (مرن د زەنگا 12دا) پرەك بوویە ژبۆ نڤیسینا رۆمانا دوویێ؟
كەوسەر بەرسڤدا: هەلبەت رۆمانا ئێكێ (مرن د زەنگا 12ێ دا)، وەك سەربورا ئێكێ بوویە پەرەكا بهێز بۆ ڤێ رۆمانێ ئەو بۆ سەردەما سەرەكی خۆ پتر ماندی بكەم.
داوی پرس مە ئاراستەی كەوسەرێ كری ئەوبوو كو رۆمانا (ئوكتوبەرەك ژ مژێ) ب داوی نەهاتیە پرۆژێ تمامكرنا وێ ب چ ئاوایە؟
كەوسەرێ دیاركر: بەلێ رۆمان بداوی نەهاتیە! د پرۆژێ بهێت دا دێ دیاربیت، ئارژان كییە؟ ئەرێ ئەوە دامەزرێنەرێ پرۆژێ ئێكگرتنێ؟ ئەوە رزگاركەر و پەیامبەرێ دوزا كوردا؟ دنێرینا ئارژانی دا نیدەم كیە؟ د عەشقا وی دا كی دێ بسەركەڤیت وەلات یان نیدەم....
ليست هناك تعليقات:
إرسال تعليق