عبدالرحمن بامەرنی
بوچی راگەهاندنا ئەلەكترونی؟ رەنگە بەرسڤا ڤێ پرسیارێ ئەگەرەك بیت كو ئەم بەردەوامیێ بدەرئێخستنا ڤێ رۆژناما ئەلەكترونی بدەین و بوچی نە، ئەڤرو نە بتنێ كومەلگەهێ كوردی، بەلكو جیهان هەمییا دبیتە گوندەكێ بچووك و ئەگەر ئەم خوە دگەل ڤان گوهورینان نە گونجینین، ئەم دێ د رێدا مینن، ئەڤە ئێك ژ سەدەهان بەرسڤان، جارێ ئەم دێ كورت دەینە بەر دەڤێ داسێ و دڤێ نڤیسینا خوە یا كۆرتدا، هند ل سەر رولێ رێنیشاندەر و بسپورەكێ دەروونی یان سیاسیەكێ رۆژەڤێ شروڤە بكەت نا راوەستم، هندی دێ ل سەر دیتنێن خوە وەك رۆژنامەنڤیسەك و گرنگیا راگەهاندنا ئەلەكترونی د مەدەنیكرنا جڤاكیدا، راوەستم.
پێنەڤێت بابەتێ ژ هەمیێ كێمتر دان و ستاندن ل سەر دهێتەكرن، بابەتێ مەدەنیبوونێیە، ئەڤە د دەمەكیدا ئەم ژ هەمی تشتەكی دی زێدەتر پێدڤی ئازراندنا بابەتێن ژ ڤی جورینە، ئەگەر مێشكی دگەل پێشڤەچوونێن دی بەراورد بكەین، وەك بلندبوونا ئاڤاهیان، بەرفرەهبوونا باژێران، هەبوونا سەدان جورێن ترومبێلین نوی، تەكنەلوژیا نوی و پێشكەفتی د هەمی بوارەكیدا، لێ مێشك وەك خوە و چ گوهورین ب سەردا نەهاتینە و هەمان عەقلیەتا سالێن هەشتیان و نوتان، هەمان عەقلیەتا باب سالاری، هەمان عەقلیەتا پەنابرن بۆ دەستهەلاتا عەشایری و هەمان عەقلیەتا مێشكەكێ داخستی یێ تەقەبوللا هیچ تشتەكێ نوی نەكەت و هەولێن خوە گوهورینێ ژی نەدەت. د عەقلیەتێن هوسان ژیدا، نە كومەلگەهـ دهێتە گوهورین و پێشكەفتنێ بخوە ڤە دبینیت، نە زانینگەهـ دشێت زانستی بەرەڤ پێش ببەت و نە یاسا ژی دشێت رولێ خوە یێ دروست بگێریت و یاسا بۆ هەمی كەسان وەك ئێك نابیت.
ئەم چبكەین باشە؟ ئەڤە رەنگە ببیتە بەرسڤا چارە چیە ئەڤا ل پێشیێ مە ئازراندی، د شیاندایە ئەم راگەهاندنا ئەلەكترونی بێخینە د خزمەتدا، ئەگەر بتنێ ئەنترنێتێ و مالپەر و سایتێن كۆمەلایەتی و تورێن جڤاكی وەربگرین، ئەڤرو لهەمی باژێر و باژێركان ئەنترنێت هەیە، ئەگەر مە هەوەكا رێكخستی هەبیت، چەندین چالاكڤانێن بوارێ مەدەنی و رۆژنامەنڤیسێن چالاك و بسپورێن دەروونی، چ برێیا رێكخراوێن كومەلگەهێن مەدەنی بن چ ژی ژ لایێ سازیێن رەوشەنبیری و پێگەهاندنێ بن و بكەڤنە ناڤ ئەنترنێتێ و ل سەر مالپەرێن جڤاكی و تورێن كۆمەلایەتی كار بكەن، ئەم دێ شێین چ ئەنجام ژێ بینین؟ ژلایەكیڤە، چاڤرونیەك دێ لدەف خەلكی پەیدا بیت و تایبەت تەخا گەنج و ژنان، چ دی نابنە گەرەوێ توندوتیژیێ، ئێدی دێ ئەو شارەزایی هەبیت، ب رێیێن یاسایێ پسیارا مافێ خوە بكەت، دێ رێ ل پەیدابوونا هزرا گرتی و بەربلاڤبوونا هزرێن داخستی و گەمارگرتی هێتە گرتن و یا ژ هەمیێ ژی زێدەتر، دێ خەلك یێ ئامادە بیت هزرا ئێك دوو قەبیلكرنێ و پێكڤە ژیانێ لدەف خوە پەیدا بكەن و هوسان ژی، نیشانێن مەدەنیبوونێ دناڤ خەلكیدا سەرهلددەن.
ليست هناك تعليقات:
إرسال تعليق