ئەدیب عبدالله
قەدەرا وانا )نەمریێ( كەتە د رێ و رەسمێن روژا پێنج شەمبی دا، كو هەمی شاگردە ل مەیدانێ گوهداریا ئاموژگاریێن وێ حەفتیێ دكەن، هەر جارێ رەنگەكێ ئاموژگاریا دهێتە ئازراندن، هەر وەكی رێڤەبەرێ هەلكەفتێ، ڤیای قەرێ وی وێ روژێ ب دەتێ، هەكە ئەركەك نەبیت.
)٠٠٠ هەر هەلنگافتنەكێ قووناغەك نوی د بری، چاخەك بو ئارمانجێ د بەزاند، ئەو نەبا دا وەرز د وەرزیدا حەلیێن، ل هاڤینان سەقەم باریت، ل زڤستانا مروڤ دبنە هەلم، گەفێن پاییزا.. خەملا بهارا دا كەنە لیسا..(.
بیرا )رێبەری( چەرخەك ل خو دا... كەتە د ململانا وێ ماموستایا د وانێ دا گوتی: )... نەبوویا بو دوعا دكرن، گور دكرنە ئاڤاهی، وەغەرچی تێدا ڤەدژین، هەر ژ رێڤە دبوونە مرید..(
قەنجە ئەگەر وەغەرچی ڤەژین، ما روژەكێ ڤەناگەرن؟ بەلێ، ما دێ هەتا هەتا ل وەغەرێ چ كەن؟! یێ ب رێڤە دێ ڤەگەرن؟
... سیبەرا دیوارێ ئاشوپا وی دێمێ وی پاوان كر، گرێ یێن درێكا گرنژینێ دا بەرە بەرە ڤەكرن، ئەو هیڤییا خورستی.. جهگیر بوو، ڤیا زوی ب مزگینی ڤە بگەهیتە مال، نەكە هەڤالەكێ وی بەری وی كێكا مزگینیێ كەركەت... مزگینییا ڤەگەرا خودانێ وێنێ ب تاقی ڤە، ئەوێ گەلەك جارا چاڤێن دەیكا وی پەنگاندین و بلقێن روندكان ژێ رژتین..
دەمێ وێ روژێ چ شویماتی نەكرین، دەملدەست دەیكا وی دگری وەربووی، وی ژی خوە تەحل و ترش كر، ڤیا نهێنیا ڤێ جارێ بزانیت.
)داوو ژ بێ گونەهـ و بەدبەختییا خوە ڤان نازا دكەم..(
- نە! ئەوێ هەنێ یێ تە ئازار د دەت، )ئاماژە كرە وێنەی( هەر تو یا د بێژی دێ ڤەگەرت! ما چ ژ تەیە..؟!
+ وەغەر چی یە ؟ پشتی وەغەرا وی ب دوو مەها خودێ تو یێ دای، دا جهێ وی ڤالا نەبیت، هەتا دوورا من دهێت ب كاروانێ وی را بگەهم.
- بو تو ژی دگەل نە دچووی ؟ ما دەم تە دزانی؟
+ تو تمام كەرێ وی، من ئەو دڤیا ژبەر تە، تو د ڤێی ژ بەر وی، بەری بچیتە وەغەری ئەزا پەنج كریم دا دگەل تە بژیم، بەرمایا ژیێ مایی بەهینی بو وەغەرێ.
...دیسا پەیڤا ریڤەبەرێ سەر ژ ئاشوپا وی ستاند .. زڤراندەڤ مەیدانا قوتابخانێ )... هەر وی دزانی چ دكر، چ دڤیا، دلوڤانێن وەكی وی، هەر ئەو ب خوە بوو، كەسێ خوە ل بەر دژواریێن وی نە دگرت د هەلكەفتناندا.. سال ڤەگەرا وی نویكرنا وەفاداریێ یە، ژ بلی ئەركی(
ب ریكا ڤەگەریانا وی بو مال، گرنژین ژ لێڤێن وی دباری.. كەیفا وی گەلەك ل وێ روژێ پتر بوو، روژا باوەرناما نیڤا سالێ ب پلا ئێكێ ل سەر پولێ گەهاندیە مال، هەر ل بەر دەروكی ڤیا خەلاتێ خوە مسوگەر بكەت، ب بێهن هەلمای ڤە .
)ماموستای یا گوتی وەغەر چی یێ ڤەدژین، برێڤەنە..(
برینێن دەیكا وی هەودانەڤە، ژبەر وی خوە ب سەرڤە نەبر، ژبلی ماچەكا ئەنیێ، خەلات بۆ هەمبێزكرنەكا دژوار و لەرزوك، )زێمارا بلویلا شڤانێ ل بەر كەرێ پەزی خەم و ژانێن خوە دبستریت ب ئاوازەكا مەلویلا چیایی، گوهێن وی گوهار كرن بو ژوور راكێشا(
ئەو مزگینی بو باپیری ژی كرە لوبەكێ تویتنێ د قەلوینا ویدا، تەلەڤزیون ژی یا ئاگرێ ژانێن رابردوویێ وی دكێت، دەمێ بێژەری د گوت:
)... بیرهاتنێن وی د بێ دویماهی نە، چەند ڤەدگێرن هەر دەستپێكن، وی ب خوە چ نە نڤیسایە، نەدڤیا ب نڤیسیت... ژبو هندێ نە هاتبوو ژبێ دەنگیێ ژ بو بێ دەنگیێ نە دگوت هەكە نەكربا، وەغەرا وی وەغەرە، ئەڤرو بو سوباهی یا وی ئا ب رێڤە دهێت..(
ئاخفتنا ماموستای بوو دروشمەك ل سەر شاشەی، وێنەی دەیكا وی ئازراند، باپیری چاڤێن خو پاقژ كرن هشێ جهـ نەما ، بو عویرانا پرسا.
- ئێ باپیر نابێژی بابو چویە كیرێ وەغەرێ ؟
+ چیروكەكا درێژە بابو، دەم دێ بو تە ڤەگێریت!
- ما نا زڤریت؟ پا دێ كەنگی هێت؟
+ هەمی روژێن وەكی ئەڤرو ل سالێ ، ئەڤ سال ڤەگەرە بهێتە ساخ كرن، ئەو ژی دهێت مە هەمبێز دكەت و ڤەدگەریت.
درۆژناما كەڤرۆكا یا ئەلەكترونی ژمارە 2 دا بلاڤبویە.
ليست هناك تعليقات:
إرسال تعليق