دیدار: هەودان سەعید
رۆمانا ئاترا ئێك ژوان رۆمانانە، ل ڤان نزیكان كەفتیە د پەرتوكخانا كوردی دا، ئەڤ رۆمانە جوداتر ژ ئەڤێن دی، ل سەر زارێ گیانەوەران، داروبەران هاتیە نڤیسین، ددەمەكێ كێمدا، بوویە جهێ دان و ستاندنێ و دا كو ژ نێزیك ڤێ رۆمانێ بو خواندەڤای بدەینە ناسكرن، مە كونتاك دگەل نڤیسەرێ رۆمانێ كر، مە چەندین پرس دانانە بەر سینگا وی و ب جوامێرانە بۆ رۆژناما مە یا ئەلەكترونی رۆژناما كەڤروكا بەرسڤێن خو دان. دیار ئەرەدنی ئێك ژوان چیروك نڤیسێن گەنجە ددەمەكێ كورتدا شیایی شوین تلێن خو ل سەر روپەلێن ئەدەبیاتا كوردی دا بهێلیت و جهێ خو بكەت، هەر ژ نڤیسینا كورتە چیروكێ یان شعرێ و نوكە ژی رۆمان.
ل بەراهیێ مە ڤیا ب پسیارەكا سادە لدوور نڤیسینا رۆمانێ بكەین و بێژین ئەو چ فاكتەر بوون خامەیێ تە لڤاندی، تو رۆمانا ئاترا بنڤیسی: دیار ئەرەدنی گوت: رۆمانا "ئاترا" ژ ڤالاهیێ نەهاتیە، بەرهەمێ وێ هەمی دیتنا من بوو یا من د ڤی ژیێ كێم دا دیتی، ڤێ هەمی زۆرداریا مرۆڤان بەرانبەر مرۆڤان، بەرانبەر سرۆشتی، بەرانبەر كەلەخێ خو و رۆحا خو. دەمێ من ئەڤە هەمی دیتی، وی دەمی من خو بەرپرسیار دیت ژ ڤێ هەمیێ من دەستێ خو دا پێنووسی و هندەك ژ ڤێ ئازارێ نڤیسی، لێ پتری من نیڤەك نڤیسی، وەكو پێدڤی دەرحەق نەدەركەفتم، لەورا من هەمی لاپەر دراندن. ئەگەر نڤیسكاری بڤێت ب سەركەڤیت، دڤێت فێری دراندنا لاپەرێن خو ببیت، دڤێت هند دلرەقبیت و ببشێت وان لاپەرێن ب دلێ وی نەهاتین نڤیسان، ب درینیت و دوبارە و سێبارە بنڤیسیت. پاشی من دوبارە دەستهاڤێت ئاترایێ و یا من ڤیایی من هەمی نڤیسی.
لدوور پسیارەكا دی كا ئایا گەنجێ كورد چەند پێدڤی ب خاندنا رۆمانێ هەیە، دیار ئەرەدنی هوسا گوت: نە ب تنێ گەنجا، بەلكو مەزنان ژی پێدڤی ب خواندنا رۆمانێ هەیە، ژبەركو كارێ رۆمان تشتەك نینە كو ب تنێ بۆ قۆناغەكێ بهێتە نڤیسین، رۆمان و ئەدەبیات ب گشتی بۆ مرۆڤایەتیێ یە و تشتێ سەرەكییە كو مرۆڤان ژ هەرفاندنێ بەرەڤ ئاڤاكرنێ دبەت، لێ مللەتەك كو خۆشییێ ژ هەرفاندنا خو ببینیت، وی دەمی گونەها ئەدبیاتێ نینە، ژبەركو پەرتووك نە وەحیە دا ب زۆری بچیتە د سەرێ واندا.
سەبارەت پەیاما كو دیاری خواستی دهندرێ ناڤەروكا رۆمانێدا ب گەهینیت، رۆماننڤیسی بڤی رەنگی گوت: نامەیەكا مرۆڤایەتیێ یە من یا گەهاندی، من زۆرداری و هێزا مرۆڤان بەرانبەر سرۆشتی و گیانەوەران و مرۆڤان بخو شەرمزاركریە. گەلەك جاران مرۆڤ د خرابن و زۆردارن، لێ ئەو بخو نزانن، لەورا پێدڤیە ل بیرا وان بینی، نڤیسینا من ژی خودیكەكە من دانایە بەر چاڤێن وان دا خو تێدا ببینن. دیاری گوت ژی: خاندەڤانێ ئاترایێ دێ فێر بیت كو رێزێ ل خو و سرۆشتی و دەوروبەران بگریت، دێ هەست پێكەت كو ئەو ب تنێ خودانێ ڤێ هەسارێ نینە، بەلكو هندەك بۆنەوەرێن دیژی هەنە دگەل وان خودانن، دێ فێربیت رێزێ ل گیانەوەران، سرۆشتی، دارۆباری بگریت.
دناڤا كاراكتەرێن ئاترایێ دا دارو بەرو گیانەوەر هەنە، ئایا مروڤ بەس نەبوون كو نڤیسەرێ رۆمانێ پەنایێ بو وان ببەت؟ دیاری بەرسڤا خو بو ڤێ پرسێ ژی هەبوو و گوت: دەمێ تو بەحسا نەهامەتی و دەردەسەریا گیانەوەران یان دارا بۆ مرۆڤان دكەی، ئەو هەست پێ ناكەن، مادەم هەست پێ ناكەن؛ وی دەمی نەچاربووم ژ زاردەڤێ وان بخو دەربارەی وێ دەردەسەرییێ باخڤم، ژ زاردەڤێ دارەكێ مافێ دارێ بخوازم، ژ زاردەڤێ بالندەیەكێ بێژم، من فرین دڤێت و من ئازاد بكەن. من هزركر هەگەر ژ زاردەڤێ وان باخڤم دێ پەیاما من ب هەستتر و زویتر گەهیت.
سەبارەت ناڤێن كاراكتەران كو گەلەك كەس بەحس لێ دكەن و دبێژن ئەڤ ناڤە بو سەر زمانێ دكەهی نینن، نڤیسەرێ رۆمانێ گوت: دەمێ مرۆڤ ناڤەكێ د دانیتە سەر بەرەكێ یان دارەكێ و وەكو بەر یان دار دەربرینێ ژێ دكەی، وی دەمی تو نەچاری ناڤەكێ دورست بكەی، بەرعاقلنینە تو ناڤێ بەری بكەیە عەبدولجبار یان خالد. مادەم نابیت ڤان ناڤان بدانم سەر، ئانكو نابیت ناڤێن چ زمانێن دیژی بدانم سەر. لەورا نەچاربووم هندەك ناڤان ژ خەیالا خو ب ئافرینم و بدانم سەر، ئانكو هندەك ناڤبن كو د چ زمانێن دیژی دا نەبن، دبیت وان ناڤان نێزیكیەك هەبیت بۆ هندەك ناڤێن دی، لێ ناڤەك كو ژ چەند پیتەكێن كێم پێكهاتبیت دێ هەر نێزیكیا خو هەبیت. ئەڤ ناڤێن من داناین ژ ڤالاهیەكێ نەهاتینە، بەلكو پتریا وان ب هزركرن و مایتێكرنا من د وان كەرەستاندا هاتینە، بۆنمونە دەما من ناڤێ بەری دانایی، پتر ژ چەند رۆژان د ناڤ كومێن بەراندا بووم و من ب هویری هزر د لێكدانا واندا و گرێلكرنا واندا كریە، هەتا من ناڤ بۆ دانایی.
ئەڤ ناڤێن من داناینە سەر بۆ منژی ل دەستپێكێ د غەریب و زەحمەت بوون، لێ كەفتنە سەر ئەزمانێ من و نوكە بۆ من د نورمالن. هەر ناڤەكێ بۆ ئێكەمین جار مە گوهلێدبیت دێ گۆتنا وی بۆ مە ب زەحمەت بیت، ناڤێ عەبدولجەبار بۆ كەسەكێ یونانی ب زەحمەتە، هەروەسا ناڤێ یونانی "نیقودیموس"ژی بۆ مە ب زەحمەتە.
ليست هناك تعليقات:
إرسال تعليق