رێنجبەر جەمیل شێخو
بامەرنێ ئەو وارگەهێ هەمی بامەرنی شانازیێ پێ دبەت كو چەندین سالە ژیانێ بسەرفەرازانە لسەر ئاخا ئەڤی واری دبنە سەر، ئاڤا كانیێن تەزی ڤەدخون ولبەر سەیبەرا كەڤر وجوانترین داروباران لناف سروشتێ جوانێ كوردستانێ ئارامیا خو دبورینن، لێ تشتێ گرنگ لڤێرێ ئەوە ناڤێ بامەرنێ شانازیەكە ژ بو هەر تاكەكەسەكی نەخاسمە خەلكێ بامەرنێ بخو ژبەر كو بامەرنێ ناڤ ودەنگەكێ زورێ مەزن ل هەمی كوردستانێ هەیە كو ب وارگەهێ رەوشەنبیریێ دهێتە نیاسین لەورا ئەف ناڤە ئەركەكێ مەزا ئێخستیە سەر هەمی بامەرنیان كو خو لڤی گوندی بكەنە خودان ژبەر كو ناڤ ودەنگێ جوانێ بامەرنێ قازانجەكا بێ وێنەیە بو هەمی خەلكێ وێ لەورا یافەرە هزر د ئاڤەدانكرنا ئەڤی واری دا بهێتە كرن داكو ئەف ناڤ دەنگێ جوان هەرێ پاراستی بیت، ئەڤە وێ چەندێ دگەهینیت ئەركێ خەلكێ بامەرنێ ئەوە خو وارێ خو بكەنە خودان بەرانبەر ئەوی مافێ ئەڤی گوندی بو رەخساندی كو سەربلنی وشانازی دناف هەمی خەلكێ كوردستانێ دا.
ژ رویەكێ دی ڤە ئەگەر ئەم ل دیروكا جوانا گوندێ بامەرنێ بگەرین دێ بو مە دیار بیت كو خەلكێ بامەرنێ هەر ژ دەسپێكا ڤەژانا ئەڤی گوندی ل سەدێ هەژدێ وێڤە خزمەتەكا بێ وێنە ژبو بلندكرنا وراگرتنا ناڤێ بامەرنێ ئەنجام داینە مینا ڤەكرنا تەكیا نەقشەبەندی كو بویە ئەگەرێ بەلافكرنا زانست وروەشەنگەرێ لهەمی دەڤەرێ وهەروەسا رەوشت وداب ونەریتێن خەلكێ بامەنێ ب درێژاتیا دیروكێ بوینە جهێ سەرنجا هەر میهڤانەكێ قەستا ئەڤی گوندی كری كو ژ لایێ خوڤە ئەف چەندە ژی بویە سەدەما بەلاف بونا ناڤ ودەنگێن بامەرنێ وهەروەسا ل دەسپێكا سەدێ بیستێ وڤەكرنا یەكەمین قوتابخانا زانستی لبامەرنێ كو بویە تەمامكەرا تەكیا نەقشەبەندی ژبو بەلافكرنا زانست ورەوشەنبیرێ، ئەڤەژی پتر سەنگا ناڤێ بامەرنێ راگرت وبلندكر، زێدەباری ئەڤێ چەندێ لدەسپێكا سەرهلدانا شورەشێن كوردستانی رولێ بامەنێ زورێ كارا بو بگرە ژ داستانا مەتینی لدەسپێكا شورەشا ئەیلولێ كو حنێرا خەلكێ بامەرنێ بو حكومەتا بەغدا دیار بو وهەروەسا ئەو داستانێن گەنجێن بامەرنێ توماركرین بدرێژاهیا شورەشا گولانێ مینا داستانا باسكا وخابیری وفروكخانا بامەرنێ ئەڤان هەمیان سەنگا بامەرنێ گران كر، لەورا پێدڤیە بێژین كو بدرێژاتیا مێژویا بامەرنێ خەلكێ وێ كار ژبو ناڤ ودەنگێن وێ كریە وئەركێ خو بجهئینایە. لدوماهێی یا فەرە ئەم هەمی بزانین كو بامەرنێ وبامەرنی تەمامكەرێن ئێكن وئەگەر بامەرنێ ئاڤەدان نەبیت دێ ڤەقەتیانەك پەیدابیت دنافەبرا ئەڤان هەردوو پەیڤان دا.
درۆژناما كەڤرۆكا یا ئەلەكترونی ژمارە 2 دا بلاڤبویە.
ليست هناك تعليقات:
إرسال تعليق