كارزان محمد حسێن بامرنی
قەسرا كافری ئێكە ژ گرنكترین شینوارێن كەڤنێن بامەرنێ، دكەڤیتە سەرێ گرەگێ بلند ل هنداڤی تاخێ گەلی ل سەنتەرێ ناحیا بامەرنێ، هەتا نوكە ژی شینوار و بەرمایكێن قەسرا كافری ل سەر رویێ ئەردی د رون و ئاشكرانە. ل سالا 1971 ز ئەندازیارەكێ جیولوجی بناڤێ )ئوسمان ئیبراهیم خالد بامەرنی(، پرتەكا گێجا قەسرا كافری برە وەلاتێ ئەمریكا و ئەو پرتا گێچێ گەهاندە دەستێ )پروفیسور روبرت فولك(، ل زانكویا تكساس ل وەلاتێ ئەمریكا، پشتی پروفیسورێ ناڤبری ئەو پرتا گێچێ بشافتی )تحلیل( كری، گوت: )تەمەنێ ڤێ گێچێ شەش هزار سالن و ئەڤە ژ چێكرنا سروشتی و مروڤایە). بڤێ پێزانینێ بو مە دیار دبیتن، كو هەبوونا ژیانا مرۆڤان ل بامەرنێ دزڤریتن بۆ چەرخێن بەرین یێن كەڤن )1(.
لدویڤ گوتنێن كەسانێن ریهسپی و دانعەمرێن خەلكێ بامەرنێ دبێژن، كو مە ژی پێزانیەك ژ باب و بابیرێن خو گوهـ لێ بویە و ئەوان ژی ژ مروڤێن بەری خو گوهـ لێ بویە: كو ل سەر دەمەكێ كەڤنار )كافران( دەستهەلاداری ل بامەرنێ دكر و قەسرا سەروكێ كافرا ل سەرێ گرەگێ بلند بوو لهنداڤی تاخێ گەلی، ئانكو ئەو جهێ نوكە دبێژنێ قەسرا كافری، دوی سەردەمیدا هەمی خانیێن خەلكێ بامەرنێ برەخێكڤە و پێكڤە هاتبونە ئاڤاكرن و هەكە بێژینك یان باگوردان لسەر بانەكێ سەرێ كوندی گرێلگربوو دا گەهیتە سەربانێ بنێ گوندی بێی كو بێژینك براوەستیت.
جارەكێ بێژینك ژ دەستێ كچا سەروكێ كافری كەفتە خارێ و ل سەر بان سەر بان بێژینك ژوردا چوو بێی ل جهەكێ براوەستیت، هەتا گەهشتیە بانێ دوماهیێ دناڤبەرا كانیاتا و جهێ نوكە یێ فروكخانە لێ هاتیە دروستكرن )2(.
هەروەسان پێزانینەكا دی دەربارەی )قەسرا كافری(، ئەو ژی لدویڤ گوتنێن كەسانێن ریهسپی و دانعەمرێن خەلكێ بامەرنێ دبێژن: ژنكا سەروكێ كافران ل بامەرنێ و ل گوبیتكا قەسرێ خو تێدا هاڤێت، و هەر دەملدەست گیانێ خو ژ دەست دا . بەلێ جهێ داخێ یە ئەگەرێ خو كوشتنا وێ نەهاتیە زانین و دیاركرن )3(.
پشتی مە سەرەدانا شینوار و بەرمایكێن قەسرا كافری كرین، دگەل ئیسماعیل جەمیل و دەمێ ئەم هەردو گەهشتینە جهێ قەسرا كافری، مە شینوارێن كەرێن دیوار و ئاڤاهیێ قەسرێ ب رون و ئاشكەرایێ بچاڤێت خو دیتن. سەرەرای گەلەك دارێن خورستی وەكی )چلی و تەراشا( لسەر شینوارێن قەسرا كافری شینببون، بەلێ هەر شینوار و بەرماێكێن بنیاتێ ئاڤاهیێ دیوارێن قەسرێ د رون و ئاشكرابون.
ژێدەر:
1. مستەفا نوری بامەرنی، ئەڤەیە بامەرنێ، لاپەر 35 .
2. دیدارەكا تایبەت دكەل هندەك كەسانێن ریهسپی و دانعەمرێن خەلكێ بامەرنێ .
3. دیدارەكا تایبەت دگەل هندەك كەسانێن ریهسپی و دانعەمرێن خەلكێ بامەرنێ ؛ سەرەدانەكا مەیدانی بو شینوار و بەرماێكێن )قەسرا كافری( ژلایێ )كارزان محمد حسێن و ئیسماعیل جەمیل(.
ليست هناك تعليقات:
إرسال تعليق