سەرنڤیسكار
ئێك ژ بەربەستێن نزیكنەبوون و هایدارنەبوونا تڤیسەرێن كورد ژ ئێك، نەبوونا زمانەكێ ستاندەردە، ب ملێ وێ ژیڤە، دوو شێوازێن نڤیسینێ، ئێك ب پیتێن ئارامی و ئەڤا دی ب پیتێن لاتینی، سەرەرای قەدەرا كورد ژ ئێك بژاندین و ل چەندین وەلاتان بلاڤەكرین، ئەڤە هەمی ئەگەرن رەوشا نڤیسینێ بگشتی خاڤ ببیت و ب تایبەت ژی، لدەڤەرا بادینان، كو ئەڤ رەوشە دوو جاران دكەڤیتە بەر سندانی، ئێك: شێوەزارێ ئاخفتنێ و نڤیسینێ ب (بادینی) یە و دوو: رێنڤیس ب پیتێن ئارامی یان كو عەرەبی یە، لڤێرە ئەو كەسێن ب شێوەزارێ بادینی (كرمانجیا سەری) دئاخڤن و دنڤیسن، ژبەركو نڤیسین لڤێ دەڤەرێ ب پیتێن ئارامی یە، بو وان ئاسان نینە، دخواندنێ دا رەهوان بن و ئەڤ كەسێن ب پیتێن ئارامی ژی دخوینن و دنڤیسن، دهەمان دەمدا بو وان ئاسان نینە، دشێوەزارێ ئاخفتنێ بگەهن، بویە مە بیر ل وێ چەندێ كر، دپێنگاڤا ئێكێ دا ئەم بشێین پرەكێ دروست بكەین، ئەڤ كەسێن ب شێوەزارێ كرمانجیا سەری دنڤیسن و دئاخڤن، ئەڤ كەسێن ب رێنڤیسا ئارامی (عەرەبی) دنڤیس)، لدوور ڤێ روژنامەیێ خرڤەبكەین و ببینە پرەك بو گەهاندنا هەر كەسەكێ حەزا خواندنێ و نڤیسینێ هەی ل هەر پارچەكا دنیایێ بیت، ژبەركو ئەڤرو تەكنەلوجیایێ جیهان گەلەك بچویك كریە و ب چركەیان ئەم دشێین ل هەر قولاچا دنیایێ تشتەك رویبدەت، ئەم پێ بزانین.
تشتی دڤی دەربارەی دا مە بڤێت بگەهینین، دێ هەولدەین، روژنامە ل دەمێ خوە دەركەڤیت، روژنامەكا بابەتی بیت، پیتەی ب قەلەمێن نوی و هزرێن نوی دەین، قەلەمێن گەنج كێشینە قادا نڤیسینێ و پشتەڤانیێ لێكەین، رێزێ ل نڤیسەرێن خوە گرین و ل زمان و چاند و ئەدەبیاتا خوە، كەلتور و پێكڤە ژیانێ و ل سەر كومەلگەهەكێ مەدەنی نڤیسین، ل سەر ئازادیا رادەربرینێ و دێ هەولدەین گرنگیێ ب وەرگێرانێ بدەین، خوە نزیكی ئەدەبیاتا جیهانێ بكەین، خوە نزیكی هزرێن وان بكەین و تشتێ دڤێ روژنامێ دا ئەم بو خوە ب سانسور ژی بزانین، هەر بابەتەكێ بێهنا دوو بەرەكیێ ژێ بهێت، هەر بابەتەكێ ئەم هەست بكەین دگەل روژەڤێ و پێشكەفتنا ئەڤرو جیهان گەهشتیێ و ئێك دوو قەبیلكرنێ نا گونجیت، بێ دوو دلی ئەم دێ خوە ژێ دویر ئێخین.
پێنەڤێت كارەكێ ژڤی رەنگی و لدویڤ پیڤەرێن مە ل سەری ئاماژە بو دای، كارەكێ ئاسان نابیت، ئەگەر، پشتەڤانی نەبیت، پشتەڤانی برێكا پێشنیار و دانا شیرەتان، برێكا هەماهەنگیا نڤیسەران، ب نڤیسینا بابەتێن وان، هینگێ ئەم دێ شێین، ئەڤێ پرێ قایم كەین و ب باوەریا مە، ئەڤە دێ بیتە پرەك و ئەم دشێین گەلەك تشتان ل ئالیێ دی ببینین، كو مە ل ئێك نزیك بكەت، ژ وان ژی، دێ مە ئاگەهی ژ ئێك هەبیت، نڤیسەرێ مە ل دوور مێزەیەكێ دێ گەهنە ئێك، چ دی نڤیسەرێ مە یێ چوارچوڤەكری نابیت، یا گرنگ ژی كو ئەم زێدەتر ل سەر راوەستین، پەیداكرنا جڤاكەكێ مەدەنی یە و دێ چاوان شێین ڤێ پرێ ئێخینە دخزمەتا ئێك دوو قەبیلكرنێ دا.
عبدالرحمن بامه‌رنى
ليست هناك تعليقات:
إرسال تعليق