بامه‌رنێ: به‌لاڤوكا بامه‌رنێ ژماره‌ 2

بو ديتنا ژماره‌ 2 لينكى كليك بكه‌

بامەرنێ‌ كانیا رەوشەنبیری

سروشتێ‌ دەڤەرا بامەرنێ‌ یێ‌ هاریكارە كو كەسێن رەوشەنبیر و بلیمەت ژێ‌ پەیداببن، هەر ژبەر جوانیا سروشتێ‌ وێ‌ یێ‌ بالكێش، دیمەنێن سەرنج راكێش، كەڤناری، گوندەكێ‌ ئاڤی و ئاقارەكێ‌ بەرفرەهـ، جهێن تایبەت بگەریان و سەیران و بێهن ڤەدانێ‌، ئاڤەدانیا گوندی بخوە دكوشا چیایێ‌ مەتینی دا، ئاڤ و كانیێن تەزی و رەسەن لایەنەكێ‌ دینە كو بامەرنێ‌ ب درێژاهییا دیروكێ‌ ببیتە خوزیێن خەلكی كو قەست بكەنێ‌ و لێ‌ ئاكنجی ببن، ژبەركو جهێ‌ ژین و ژیارێ‌ یە، دیسان بویە مەلبەندەكێ‌ بازرگانی ژ هەمی ئالی و دەڤەران قەست دكرنێ‌ و بەرهەمێن خوە لێ‌ بەرچاڤ دكرن، سەرەرای هەبونا تەكیا شێخێن تەریقا نەقشەبەندیا كو بویە مەلبەندێ‌ فێركرنێ‌ و زانینێ‌، چەندین باوەرنامەیێن ئاینی و مریدێن تەریقەتێ‌ ژێ‌ دەركەتینە، پێنەڤێت ژی جهەك ب مەلبەندێ‌ روشەنبیریەتێ‌ بهێتە ناسكرن دێ‌ چەندین رەوشەنبیر و هوزانڤان ژێ‌ دەركەڤن.

بامەرنێ‌ شیایە گەلەك تایبەتمەندییا بخوڤە بگریت، باوەری ب عەشیربونێ‌ و رولێ‌ ئاغا وەك هەمی عەشیرێن كوردان دناڤ دا نەبویە، بتنێ‌ رولێ‌ شێخان و دسەد سالیا دوماهیێ‌ و بهاتنا شێخان بو ڤی گوندی، بناڤێ‌ ئاینی دەستهەلاتا شێخان بەلاڤ بویە و نە بتنێ‌ بامەرنێ‌ بەلكو ڤێ‌ دەستهەلاتێ‌ رهـ و ریشالێن خوە دچارچوڤەكێ‌ مەزن دا چاندبون و سنور دەرباز كربون، بتنێ‌ ژبەركو خەلكەكێ‌ ئیماندار و موسلمان، ددرێژاهیا دیروكێ‌ ژی دا كورد هەر بڤی رەنگی بوینە و باوەردار بوینە و ژبەر هندێ‌ ژی هەر زوی خوە ملكەچی بیروباوەرێن خوە دكەن. ژبلی دەستهەلاتا ڤێ‌ تەریقەتێ‌، ئەڤ كەسێن لبامەرنێ‌ دئاكنجی ژ گەلەك لایەنان ڤە هاتبون و عەشیرێن جودا و دەڤەرێن جودا بون و دناڤ (بامەرنێ‌) دا خوە ب بنەمال ددانە نیاسین و ژ دەرڤەی بامەرنێ‌ ژی خوە ب بامەرنی ددەنە نیاسین، ژبەر هندێ‌ بیاڤ گەلەك یێ‌ خوش بویە بهەبونا رەوشت و تیتالێن جوددا دئێك بازنەیێ‌ ئاكنجیبونێ‌ دا، نیڤشكەكێ‌ باش و پاقژ پەیدا ببیت دویر ژ توندو تیژیێ‌ و هەڤركیێ‌ و بگرەوبكێشێ‌، هەر ئەڤە ژی بویە كو تا نوكە ژی خەلكێ‌ وێ‌ برەوشەنبیر دهێنە نیاسین، ژبەركو رێزگرتن و خوشكاندن و جوامێری و دنیا دیتی دناڤ دا هەبویە.

الاثنين، 17 أكتوبر 2016

به‌لاڤوكا بامه‌رنێ ژماره‌ 2

ليست هناك تعليقات:

إرسال تعليق