توی جهێ زێر و خزینا
كەسێ داخاز بۆ تە نە ئینا
لەو دگری رۆندك و خوینا
رۆندك و خوینا تو دبارینی
هەر بهارا كەسك و شینی
سەربەستیێ دێ تو بینی
دا تو تازیا من هەلینی
ئەڤ چیا وەختێ بهارێ
نیسانێ و هەیڤا ئادارێ
ژ هێلینا تەیر هاتنە خارێ
دگەل كەوا یێ دكەن كبارێ
ڤان چەلا دێ تو ب بینە
چەند نهال، دۆل و گەلینە
كەسك و سۆر ئال و شینە
پڕ پلنگ و پەز كویڤینە
ما تو بۆچی شەرمزاری
تو ب هەڤال و دۆست و یاری
بو تە بو نە هاریكاری
دەربێخن تە ژبن وی باری
ئەڤ چیایە بۆ مە ملكە
بۆ مە كوردا هەمیا جلكە
رابە چاڤێت خۆ تو زلكە
ئو دلێ خۆ قەد نە كولكە
تو دلێ خۆ قەد نەهێلە
ئەڤ فەلەك یا ب شێل و بێلە
چەند خۆرت و لاۆ و جحێلە
ل بنگەها تە بونە پێلە
ئەو مەتینا ل دۆرا گوندی
كانیێت ئاڤێ ل گویزا جندی*
ئەو كەلا ئێڤرستا هندی
وەكی وێ تو بەژن بلندی
ئەڤ چیا كو بۆ مە خاكە
ئەو شەمالدان و چراكە
لناڤ دنێ خۆ ئاشكراكە
لاوێ زەند پیلا تو راكە
چەند لاو و تۆلاز و مێرا
ئو خودان شالۆك و بێرا
لناڤ هەمی تەكیا ئو دێرا
وان خودانكە شپتی شێرا
وان هەما وەك خزم و خالا
چەند خودانێت شەپك و شالا
دگەل هەمی جۆتیار و پالا
بونە هەڤگور وەك هەڤالا
ئەی چیا لاوێت تە هاتن
شبتی روژێ ئەو هەلاتن
دگەل مەتینی ب خەباتن
بو تە گوری و خەلاتن
بڤی تەرزی ئەم یێ دبینین
بێ خەبات ئەم قەد نا روینین
دارا ئازادیێ دێ چینین
خورت و سەربەست دا ب مینین
* كانیەكە و سەیرانگەهەكا خوشە ل هنداڤ بامەرنێ، دكوشا چیایێ مەتینی دا.
ليست هناك تعليقات:
إرسال تعليق