بێوار داخاز
هەیامەكە د ناڤ جڤاكێ مە دا رەوشەنبیرێن چوكەر مشەبووینە، جڤات ب ناڤێن وان تژیبووینە، شاشەیێن كەنالان ب دیدار، چاڤپێكەفتن و مێڤانكرنا وان مژیلبووینە. هەمان كەس جار دێ بینی شارەزایێ جڤاكییە، جار ژی بسپورێ ئابوریە، جار ژی شڕۆڤكارێ سیاسییە هەتا هندەك جاران شارەزایێ پەیوەندیێن ژن و مێرایە، هژمارا وان رەوشەنبیرێن چوكەر گەهشتیە ژمارەكا ئاشوپی، ئەگەر هەر ئێكی ژ وان كەسەك بتنێ د جڤاكێ مە دا گوهوریبا، دا ئەڤ جڤاكە هەمی هێتە گهورین.
ئەگەر، ئەم ژ لایێ زانستی لسەر ڤێ دیاردێ ب راوستین دێ بینین كو ئەگەرێ ڤێ چەندێ ژبو وێ یەكێ دزڤریت ئەم دروستی ژ رامانا رەوشەنبیر نە گەهشتینە، راستە تێت گۆتن كو (رەوشەنبیر ئەو كەسە یێ پیچەكێ ژ هەر تشتەكی دزانیت و هەمی تشتان ژ ئێك تشت دزانیت)، لێ دا كو ب درستی د رامانا رەوشەنبیر بگەهیت، دڤێت دەستپێكێ بزانین كەنگی و ل كیڤە رەوشەنبیر دەركەفتیە، نە هەر كەسێ زانكو ب دیماهیك ئینابیت ئەو رەوشەنبیرە، نە هەر كەسێ زانستەك بدەست خۆ ڤە ئینابیت رەوشەنبیرە، رەوشەنبیر رامانەكا دژی و دیتنەكا دویر بخۆڤە دگریت.
پرسا رەشەنبیران گەلەك یا هەستیارە، گرنگیەكا مەزن ل سەر ئاستێ جڤاكی و لوكالی دا یا هەی، ئەڤ پرسە پشتی داویا چەرخێن ناڤین ل سەرانسەری جیهانێ هاتیە ئازراندن و باسكرن، هەر ژ چەرخێ هەڤدێ چینەك (تەخەك) ل ئوروپا
پەیدابوو و ب ناڤێ تەخا رەوشەنبیران هاتە ناڤكرن، پشتی چەرخێ نوزدێ ئەڤ تەخا هە، هەر ب وان ناڤ و سالۆخەتێن ل ئوروپا پێ پەیدابووی دەست ب گەشەكرنێ كر هەتا گەهشتیە وەلاتێن ئەفریقی و ئاسیەوی و ئەمریكا لاتینی، گەهشتیە جڤاكێ مە ژی، لەوما دبێژم هەتا مرۆڤ خۆ نەنیاسیت و رەوشەنبیر خۆ نە نیاسیت، نەشێت جڤاكێ خۆ بنیاسیت، نەشێت وێ پەیاما ل دەف خۆ ب گەهینیت، ئانكو دڤێت هزرمەند ل كیڤە بیت تایبەتمەندیێن خۆ یێن جودا ژ كەسێن دی بزانیت، كا د چ كاودانێن دیروكی و جڤاكی دا پەیدابوویە، كا رهـ و ریشالێن ڤان سالۆخەتان ژ كیڤە هاتینە، ئەڤجا ژبەركو ب درستی ئەم د رامانا وێ نە گەهشتینە ئەم نەشیاینە رەوشەنبیرەكێ راستەقینە ئاڤا بكەین، رەوشەنبیر" پێدڤی ب شڕۆڤە كرنێ و راڤە كرنێ نابیت ب راستی ژی رەوشەنبیر ئەو كەسە یێ خۆدان دیتنەكا بەرفرەهـ، ڤێ پەیڤێ پەیڤەكا هەڤواتا د زمانێ ئنگلیزی و فەرەنسی دا هەیە، هەڤواتا پەیڤا "رەوشەنبیر" د زمانێ فەرەنسی دا پەیڤا Clairvoyant ئانكو "بیین دیر" یان روناكبیر، واتا ئەو كەسێ ب چ ئیدولژیكێن تایبەت ڤە نەگرێدای و هزرێن وی د بەرفرەهـ و پەرژاندی و جوداهیەكێ د دەتە وی چەرخێ تێ دا دژیت و وی ئەردێ ل سەر دراوەستیت و رۆلێ وەلاتێ وی، هەر وەسان بشێت ئاریشێن دكەڤنە د جڤاكێ وی دا شڕۆڤە بكەت و بەلگەیان پێشكێش بكەت و خەلكێ دیتر تێ بگەهینیت، ئاها ئەڤەیە Clairvoyant ب رامانا فەرەنسی یا كو ئەم دبێژینێ رەوشەنبیر.
ئەڤجا د جڤاكێ مەدا رەوشەنبیری بوویە كەرەستەك مینا كەرستێن خارن و ڤەخارن و ئاڤاكرنێ، مە هاوەردەكریە لەوماژی، رەوشەنبیرێ مە بسەرنەكەفتیە.
ليست هناك تعليقات:
إرسال تعليق